كيف احافظ على بيتي نظيف ومرتب
كيف احافظ على بيتي نظيف ومرتب
1- اول واهم خطوة لا تتركي مواعين تتكوم حتي لو طبق وافضل لو في غسالة اطباق
2- اللعب تتخزن وتطلعي عدد محدود جدا كل فترة وتشيلي الباقي كل ما هتطلع اللي خزنتيها الاطفال هتحس انك جبتلهم لعب جديدة وبكدة توفري كمان
3- بعد العيال متخلص لعب تلم لعبها علي طول
4-ويوميا الصبح ترتبي السراير
وعلى مدار الاسبوع حاولي تنظفي بشكل سطحي وعند الضروره مثل ترتيب الوسائد في مكانها.
يعني مش لازم تطلعي المكنسه كل يوم لو الامر ميستدعيش ومش لازم تشيلي سجاجيد وكنب وهكذا. شويه ديتول في بخاخه وترشي على الارض وتمسحي بالمساحه العريضه اللي فيها الفوطه هتلاقي الارض نظفت وريحه البيت حلوه.
5-ثبتي يوم في الاسبوع ده لتغيير الملايات ومسح الشقه كلها والشبابيك وتلميع الاثاث، ونظافه الحمامات من فوق لتحت تنظيف عميق.
6-الحمامات خلي فيها فرشة بزراع طويل ومنظف بديتول، يوميا الصبح تنظفي في السريع التوليت والحوض والبانيو.
7- واكتر حاجه مهمه متخزنيش حاجه تخلصي من الكراكيب افرزي كل اسبوع حاجه:
- مره المطبخ
- ومره الادراج
- ومره الدواليب
- ومره الجزامه
- ومره توك واكسسوارات الاولاد ولعبهم
و الحاجه اللي تعدي عليها سنه مثلا وحسيتي انك مستخدمتيهاش اتخلصي منها علطول متتردتتيش متقوليش ممكن بكره احتاجها اوعي تخزني . لان الحاجات دي اللي بتكركب البيت جدا.
8-في المطبخ حطي بولة كبيرة بلاستيك بجوار المكان اللي بتجهزي فيه الطعام ديه نصيحة من ريتشل راي بتاعة الطبخ وجربتها من سنين روعة بتفضل الرخامة نضيفة والبوتاجاز لاطول فترة.
9- الزبالة تترمى اول بأول ولو عائله كبيرة او بتطبخي يوميا هاتي بوكس كبير للزبالة او حطي في كيس كبير علشان الصغير هيتملي بسرعة والزبالة هتقع على الارض وتنتشر في البيت كله فتافيت الاكل.
10- حاولي متجيش على صحتك علشان يوم ما هتقعي محدش هينفعك وده انا ادركته متأخر للاسف علشان كان عندي وسواس النظافه.
11- استخدمي مطهررات ومعطرات على المفارش والكنب والستاير.
12- يوميا شغلي غسالة الملابس وخلى عدد محدود من هدوم البيت لكل طفل.
.
13 -اهم حاجه ترتيب الدواليب والادراج يكون بشكل دوري يعني متشيليش الهدوم من المنشر الا لما تتطبق ومتتحطش في الدولاب الا اذا كان مترتب مش فوق بعضه ومتفركش .
14- نصيحتي ليكي بقه بوكسات لكل حاجه ده هيسهل اوي عليكي وعلى الولاد هتكونوا حفظين مكان الحاجه ومش هتحتاجوا تخدوا وقت في الترتيب .
15-باسكت زباله في كل اوضه .
16- علبه مناديل في كل اوضه .
17- التلاجه لازم تكون متنظمه
_ رف للجبن
_ ورف للالبان والعصير والزبادي
_ورف لبواقي الاكل ولازم تكون في علب مقفوله _ورف للفاكهه والخضار
ويا سلام لو كانوا في بوكسات.
